Зграда од песок која поттикнува еко-туризам

Во желбата да се создаде средина за градење на заедницата и да се негува екологијата во нивната околина, создаден е интересен проект со сводови од песок, кој ќе биде динамичен простор за неговите жители и за туристите што го посетуваат. Овој комплекс е од витално значење за Филипините, каде што ќе се наоѓа, архипелаг од 7.641 острови, од кои секој има свој посебен културен и природен идентитет.

Клиентот сакал да изгради фарма од 3,8 хектари на остров во провинцијата Кезон. Предлогот бил дополнително развиен со цел да се создаде нова одржлива типологија на еко-туризмот што ќе ја развие локалната култура на земјоделство и рибарство, но исто така и да претставува уникатен начин на градење, производство на храна, забава со динамичен простор за живеење и туризам.

Како резултат на тоа, создаден е систем на хиперболични кластерски единици наречен Песочен кластер Cagbalete, кој поддржува се што е наведено. Овој објект е во голема мера инспириран од корали, со оглед на богатиот морски живот и биодиверзитетот на локацијата.

Затоа, добиената структура е од мешана употреба. Се одликува со приватна резиденција на клиентот, ресторан, туристички резиденции и фарми кои се фокусираат на употреба на ендемични видови растенија и сезонско одгледување ракови од кал.

Друга карактеристика на овој комплекс е што ќе се гради со мешање на локален песок со земја и кал и со тоа ќе се поддржи еко-конструкцијата со минимален отпад и природни материјали. Оваа зграда сигурно остава неверојатен впечаток и поставува нови граници во биофилната архитектура.

Архитектите на проектот, исто така, вклучиле локални мрежи во проектот како еден вид мембрана што се меша со други материјали, што резултирало со нова и локализирана патина, биофилна мембрана која создава интересна трага во формата.

Мрежите функционираат и како „превез“ над структурата, како воздушен слој што штити од сонце и дожд, но служат и како неформални места за попладневна дремка за жителите и туристите.

Исто така постои и велнес пештера со солена вода, заедно со кал и базени што ќе им овозможат на туристите сензационално искуство.

Кога заоѓа сонцето, оваа зграда се претвора во оаза за мирен ноќен живот со галерии на повеќе нивоа, простории за собирање и специјални настани, сето тоа додека функционира како светилник за локалните бродови.

Овој совршен еколошки проект комбинира самоодржлива конструкција каде електричната енергија се произведува од соларни панели, поставена како чадори, а просториите користат природна вентилација. Целта и на архитектот и на клиентот е да го зголемат еколошкиот свет, да го зачуваат островот, да ги замаглат границите меѓу природното и вештачкото во оваа структура, да го комбинираат туризмот, земјоделството и риболовот и сето тоа, додека на структурата и даваат поинаква намена за различни годишни времиња.

Песочните кластери на Cagbalete ја имаат освоено наградата на овогодинешниот World Architecture Festival awards, а проектот е и финалист во категоријата „Експериментално“ на Светскиот фестивал за архитектура, што ќе се одржи во декември 2021 година во Лисабон.

Архитекти на проектот се Carlo Calma Consultancy Inc.