Државен извиднички ориентационен натпревар – ДИОН 2026

Во периодот од 22 до 25 мај 2026 година, во Извиднички дом „Орел“ во с. Орел, Свети Николе, се одржа Државниот извиднички ориентационен натпревар – ДИОН 2026, најзначајниот натпреварувачки настан во календарот на Сојузот на извидници на Македонија.

Оваа година ДИОН беше реализиран во рамките на Вториот меморијал „Васко Саздовски“, во организација на Извидничкиот одред „Гоце Делчев“ од Свети Николе. На настанот учествуваа над 120 извидници од Свети Николе, Скопје, Куманово, Штип, Струга и Прилеп како натпреварувачи, волонтери, членови на натпреварувачката комисија и поддршка на организацијата. Во текот на четирите дена тие ги покажаа своите знаења, вештини и подготвеност, но и создадоа атмосфера исполнета со дружење, соработка и вистински извиднички дух.

ИЗВИДНИЧКИ ВЕШТИНИ И ТИМСКА РАБОТА

ДИОН претставува натпревар кој ги обединува најважните знаења и практични вештини што младите ги стекнуваат преку извидничката програма. Во текот на натпреварот учесниците се соочија со бројни задачи поврзани со ориентација и снаоѓање во природа, движење по азимут, пронаоѓање контролни точки, топографија и изработка на различни теренски материјали.

Натпреварувачите цртаа кроки, панорамски скици, профил на терен и скици на дел од патеката, ги покажаа своите знаења од семафорска сигнализација и Морзеова азбука, решаваа извиднички и општокултурни тестови, како и задачи од прва помош. Дел од дисциплините вклучуваа и практични активности како поставување бивак, изработка на патенти, подготовка на храна во природа и полигон на снаодливост.

Сите активности беа осмислени да ги тестираат знаењата, практичните вештини, издржливоста и тимската работа на учесниците, но и да го поттикнат учењето преку искуство – еден од основните принципи на извидничкиот метод.

РЕЗУЛТАТИ И ПРИЗНАНИЈА

По сумирањето на резултатите од сите дисциплини, најуспешни на ДИОН 2026 беа:

Категорија Извидници

🥇 Прво место – ПСИО 1
🥈 Второ место – Гоце Делчев 1
🥉 Трето место – Гоце Делчев 2

Категорија Истражувачи

🥇 Прво место – Јадран 2
🥈 Второ место – Еквинокс 1
🥉 Трето место – Гоце Делчев 3

Категорија Ровери

🥇 Прво место – Јадран 6
🥈 Второ место – Галеб 2
🥉 Трето место – Јадран 5

БЛАГОДАРНОСТ ДО ДОМАЌИНИТЕ И ВОЛОНТЕРИТЕ

Успешната реализација на ДИОН 2026 беше овозможена благодарение на посветената работа на волонтерите, членовите на натпреварувачката комисија и домаќините од Извиднички одред „Гоце Делчев“ – Свети Николе, кои вложија огромен труд во подготовката и спроведувањето на настанот.

Посебна благодарност упатуваме до Извиднички одред „Гоце Делчев“ – Свети Николе за домаќинството и организацијата на Вториот меморијал „Васко Саздовски“, преку кој се негува споменот на личност која оставила значаен белег во македонското извидништво и продолжува да инспирира нови генерации извидници.

ИЗВИДНИЧКИ ДУХ

ДИОН 2026 уште еднаш покажа дека извидништвото не е само натпреварување, туку и можност за учење, личен развој и создавање трајни пријателства. Низ предизвиците на теренот, учесниците ги покажаа своите знаења, упорност и тимски дух, потврдувајќи дека најголемата победа секогаш е стекнатото искуство и пријателствата создадени по патот.

Честитки до победниците, но и до сите учесници кои достојно ги претставија своите одреди и придонесоа ДИОН 2026 да биде уште едно успешно поглавје во македонското извидништво.

Автор: Дино РЕЛУШКОСКИ