Ултрамодерно ентериерно решение на стан во Киев

Украинскиот архитект Иван Јурима, го дизајнираше овој модерен ентериер во Киев на површина од 200 м^2.

Ентериерот е базиран на минимализам, едноставни линии и складност на боите и текстурите. Доминантна боја во ентериерот е белата, а со употреба на темни тонови на некои ѕидови и детали ја разбива монотонијата и го прави станот потопол.

Во големата дневна соба доминира ѕидот со каминот како и мошне интересното линиско осветлување кое, поради својата положба, создава ефект на издолженост на просторот.

Станот е уреден по принцип на отворен простор. Така се избегнати непотребни коридори и ходници.

Во 200 квадаратни метри се сместени шест соби, три бањи и дневна соба со кујна и трпезарија.

Кујната е до дневната соба. Таа е уредена со кујнски остров и интересен тавански аспиратор. Доминацијата на белата боја е разбиена со нагласени делови изработени во дрво и црно стакло.

Во трпезаријата се искористени познатите столици Tulip.(Лале)

Спалната соба не е оптoварена со непотребен мебел, дури е избегнат и телевизор. Креветот е конзолно прикачен за ѕидот. Спалната има директен пристап во родителската бања.

И ѕидот на бањата е решен необично со извлечени коцки кои се осветлени со скриени LED светилки.

Под некои од коцките се кријат орманчиња кои се отвораат со механизам на допир.