Револуционерна луксузна соларна јахта со потпис на Zaha Hadid Architects

Соработката на две врвни имиња, како што се британското биро Zaha Hadid Architects и престижното италијанско бродоградилиште за луксузни јахти Rossinavi, очекувано носи револуционерен производ, претставен на Milan Design Week 2022 – катамаранот Oneiric, луксузна, одржлива јахта, водена од вештачка интелигенција.

Овој катамаран ги поместува границите во сферата на јахтингот, бидејќи истовремено обезбедува одличен дизајн и удобност на корисниците, а исто така се грижи за енергетската одржливост и чувување на животната средина на океанот. Прекриен е со соларни панели интегрирани во дизајнот, кои полнат батерии со висока ефикасност и овозможуваат еднодневната пловидба да биде целосно на електричен погон, додека на подолгите пловидби тоа е високи 70 отсто, со заштеда во емисијата на CO2 и до 40 тони во споредба на конвенционалните пловни објекти. Батериите кои се полнат на дневна светлина може да се користат и додека катамаранот е во мирување, па додека е врзан, батериите можат да го снабдуваат објектот со електрична енергија на копно.

Zaha Hadid Architects останале верни на својот препознатлив дизајн, екстериерот и ентериерот инспирирани се од флуидноста и динамиката на брановите. Кривулестите линии и рефлектирачките површини на надворешноста на јахтата продолжуваат во внатрешноста, замаглувајќи ги линиите помеѓу бродот и морето. Користените материјали се претежно рециклирани и биоразградливи.

Луксузна јахта со главниот апартман во ранг на најдобрите хотели, содржински е опремена за повеќедневно пловење за 10 гости.

Јахтата долга 44 метри има неколку внатрешни и надворешни простори опремени за дневен боравок и јадење, како и медијска соба со модерни технологии за забава.

Капацитетот на гости е 2 + 8, а сместувачките единици се состојат од главниот апартман и уште четири гостински кабини. Покрај тоа, за персоналот се предвидени дополнителни четири кабини.

Спалната соба во главниот апартман има панорамски поглед од 180 степени и прозорци кои овозможуваат влез на природна дневна светлина. Овој апартман е директно поврзан со надворешната дневна област која има специјално дизајнирани системи за засенчување.

Технолошките иновации и филозофијата за одржливост на Rossinavi се инспирирани од фитопланктонот, мала морска алга која ја претвора сончевата светлина во енергија и обезбедува повеќе од половина од годишното производство на кислород на Земјата. Нивната технологија Zero Noise, заедно со електричниот погон на соларните панели на катамаранот Oneiric, овозможува целосен акустичен комфор.