Рама: Главното прашање не е цената на струјата, туку дали воопшто ќе ја има

Премиерот на Албанија, Еди Рама, повторно ги повика граѓаните да штедат електрична енергија, нагласувајќи дека не станува збор само за финансискиот трошок. „Притоа најглавното прашање не е колку ќе се покачи цената, туку дали воопшто ќе има енергија во зима“, истакнал тој. Зборувајќи за медиумите, после состанокот на кабинетот, Рама изјавил дека моменталната криза во Албанија е полоша отколку во претходните две години. Владата ќе продолжи да ја субвенционира електричната енергија за домаќинствата и за малите компании, и ќе се потруди да влијае врз цената.

Исто така тој истакнал дека се одложува воведувањето на тарифата од 36 евроценти по kWh за домаќинствата кои трошат повеќе од 800kWh електрична енергија месечно. Албанија речиси целокупната електрична енергија ја произведува во хидроцентрали. Кога ќе настапи голема суша, како што тоа беше случај оваа година, земјата мора да увезува електрична енергија, па буџетот е под огромен притисок и поради истовремено исклучително високите цени.