Foster + Partners, Dolunay villa на турскиот егејски брег

Резиденцијата Dolunay villa се наоѓа покрај брегот на Егејското море во турската југозападна провинција Muğla. Новата приватна вила, проект на архитектонското биро Foster + Partners, внимателно е поставена сред природен амбиент со приоритет на спектакуларните погледи на морето.

Проектот ги користи природните контури на локацијата за да создаде ниска зграда, кон која кога се приоѓа изгледа како објектот да е еднокатен. Куќата е вклопена во прекрасната медитеранска градина, исполнета со миризливи растенија, како мајчина душица и лаванда, сезонски растенија и зрели маслинови дрвја.

Главниот влез ве носи директно во срцето на вилата со приватните семејни простори кон источната страна, ориентирани да одговорат на контурите на локацијата и јавните, заеднички простории, дневниот боравок и трпезаријата на запад, со исклучителен поглед на зајдисонцето над Егејот.

Патувањето низ вилата е од „непроѕирно до отворено“, како одраз на различните нивоа на приватност, а проектот има за цел да ги замагли границите помеѓу домувањето внатре и надвор, со големите стаклени врати долж фасадат,а кои овозможуваат целосен проток помеѓу внатрешните и надворешните простори.

Куќата ја карактеризира рачно изработен, дрвен кров, проектиран во соработка со швајцарската фирма Blumer Lehmann. Монтажната и прецизно изработена конструкција, содржи значително помалку јаглерод од типичен бетонски покрив. Дабови греди се потпираат на челични столбови, подупирајќи големи, седум ипол метарски конзоли, со што се добива голем простор на отворено под сенка и сенка на дворот одзади.

Централните скали кои ги поврзуваат двете нивоа, направени се од цврст португалски камен варовник, носени од затегнати кабли, кои поминуваат низ каменот, без други видливи потпори, зачувувајќи ја чистотата на скалите и нудејќи чувство на леснотија. Балустрадите се направени од тенки стаклени цевки со дрвени ракохвати, фино обликувани.

Одразувајќи го високото нивоа на занаетчиска изработка во дизајнот, секој елемент е дизајниран да одговори на специфичните барања на клиентот – од рачно резбани врати од полно дрво до изработка на керамичките плочки и мијалниците во бањите.

Во склоп на вилата сместен е и помал павилјон за зајдисонце, поблиску до брегот, кој е направен со ѕидови од природен камен, блиску до маслинки со дрвени столици и стреи од бамбус.

Архитектите се инспирирана од непосредното опкружување на вилата, па така во ентериерот се користи природна палета на материјали, која се состои од камен, дрво и бронза, а се одликува со различни тонови на топло кафеави и сиви бои, кои можат да се видат и низ карпестата околина и песочните плажи на локацијата. Изборот на мебел од даб и кожа нуди опуштено, елегантно чувство во оваа куќа за одмор.