Порта3 – градежништво, архитектура и екологија Порта3 – градежништво, архитектура и екологија
Холандските студија MVRDV и Zecc Architecten ги открија плановите за пренамена на напуштена црква во холандскиот град Херлен, со додавање базен со прилагодлив под кој им овозможува на посетителите да „шетаат по вода“.
Со проектот Holy Water („Света вода“), архитектите планираат да создадат ново место за заедницата, во кое ќе се чуваат и почитуваат историските елементи на поранешната црква Свети Фрањо Асишки, која е изградена во 1923 година и е празна веќе две години.
Нови идеи за стари цркви
Во централниот дел на црквата, нејзиниот наос, предвидено е да се постави базен кој ќе може да се издигнува и целосно да го сокрие подот, а просторијата може да остане покриена со плиток слој вода, за посетителите да имаат чувство на „одење по вода“.
„Стапката на празни цркви се зголемува, па мораме да осмислиме нови, креативни идеи за тоа што можеме да направиме со тие згради“, рече коосновачот на MVRDV, Вини Мас, додавајќи: „Зошто повторно да не им дадеме општествена функција, како што имале некогаш? Јавниот базен е совршено решение за тоа. Замислете како пливате на грб и гледате нагоре во сводот на црквата и неговите витражи“.
Архитектите сметаат дека со покривање на подот на црквата со тенок слој вода, може да се создаде прекрасен визуелен ефект, при што црквата се враќа на својата изворна форма и делува уште поголемо и поимпресивно преку рефлексијата.
Предвидено е во поранешните странични кораби на црквата да се постават прозорци со лачни отвори, преку кои ќе се отвораат погледи кон базенот, а ходниците ќе водат до соблекувалните и кафулето, кои ќе бидат сместени во задниот дел на објектот.
Црковните клупи во нова улога
Црковните клупи повторно ќе се користат како седишта за посетителите околу базенот и како маси во кафулето, додека проповедалницата, од која некогаш се одржувале проповеди, ќе стане место за спасител.
Планирано е да се додаде изолација на надворешната страна на кровот на црквата за да се зачува погледот на оригиналните внатрешни материјали применети на покривната конструкција, а редовите лампи над базенот ќе служат и како визуелни водичи за капачите, за да можат да ја следат својата лента.
