Порта3 – градежништво, архитектура и екологија Порта3 – градежништво, архитектура и екологија
Во Белград е отворен Belgrade Kitchen Party – нов концепт на ресторан според проект и идеја на бирото Remorker Architects.
Просторот има 130 квадратни метри и може да прими 40 лица како класичен ресторан или до 80 лица доколку се користи за журки. Дизајнот на просторот е од една страна груб и индустриски, а од друга елегантен и минималистички, во сиви тонови со понекои дрвени површини.
Belgrade Kitchen Party е проектиран со тенденција главниот акцент да го даде на организацијата и естетиката на шарената храна и настаните во кујната.
Централното место во просторот го заземаат работните површини кои се достапни за сите гости за да на нив, заедно со куварите, ги измастат прстите и да го почувствуваат задоволството на добрата забава.
Белградските куќни журки се познати по тоа што најдобриот провод е секогаш во кујна, па авторите сакале овој концепт да го пренесат и во овој комерцијален угостителски простор.
Индустриски дизајн блиску до луксуз
Седењето е организирано околу шанковите, кои во исто време претставуваат подлога за ручавање и работната површина за подготовка на храната.
Работните површини се големи, изработени од керамика со структура на сив мермер, со што индустрискиот дизајн се приближува до луксузот.
Централниот остров со уреди вградени во челичната конструкција обложена со метални газишта и голема хауба се главниот фокус на просторот – сцената. Овој тежок индустриски елемент се раствора од мирисите и вкусовите на јадењата што се крчкаат врз него.
Како и зад секоја сцена, така и зад кујната има монументален ѕид обложен со фасадни плочи на кои се наоѓа контрашанк. Ѕидот воедно ги крие и сервисните простории и тоалетот.
Дневна соба од стари белградски станови
На едниот крај од просторот има зона за одмор со клавир, кој пружа атмосферата на дневна соба на старите белградски станови, додека на другиот крај има трпезарија со масивни дрвени трпезариски маси.
Масите примаат 20 луѓе и потсетуваат на собирите во градските станови за време на прослава на слави.
Осветлувањето е слично на осветлувањето на сцената со насочени снопови на светлина кон работните површини, кои ги истакнуваат главните настани со чадење.
Тешките плишани завеси на фасадните ѕидови помагаат на сценското, луксузното и интимното искуство.
Желбата на архитектите била гостите да се воведат во срцето на професионалната кујна, во фреквентен простор кој често е достапен само за персоналот, место каде што се чуваат тајни непознати за домашните рингли и рерни. Место каде што секако може да се забавувате, добро да јадете, да научите нешто, но она што е најважно – да си играте.
