Промовирано 39.издание на книгата „Нојферт архитектонско проектирање“

Скопје – „Нојферт архитектонско проектирање“ е насловот на 39.издание на книгатаобјавена првпат на македонски јазик, а промовирана денеска на Архитектонскиот факултет воСкопје.

Стручниот рецезент на книгата проф. Анета Христова на денешната промоција рече дека станува збор за прирачник од Ернст Нојферт односно библија на архитектонското проектирање.

– Тоа е првиот досега најопфатен извор на информации за сите области на архитектонското проектирање. Промоцијата се совпаѓа во два јубилеја – 25-годишнината од смртта на Ернст Нојферт и 75-годишнината од издавањето на првото издание на книгата, истакна Христова.

Таа посочи дека во изданието се содржани актуелни теми во архитектурата и градежништвото, од кои најактуелни се јакнењето на свеста за животната средина, за енергетската ефикасност, заштита на енергетските ресурси итн.

Основачот на издавачката куќа Арс Ламина, Дарко Фидановски истакна дека досега изданието е појавено на 18 јазици и го има во над милион копии тираж насекаде низ светот.

– Бидејќи книгата беше дел од проект 500 книги на Владата преку Министерството за транспрот и врски, таа се изработи и е поделена по библиотеките и на други места каде што ќе биде дистрибуирана. Решивме да направиме наше сопствено издание кое ќе биде во продажба засега во книжарницата „Три“ во ГТЦ. Цената на изданието е 3.900 денари, што е 20 до 30 отсто пониска цена од соседните земји. Ќе бидат доделени ваучери за сите студенти да го добијат по цена од 50 отсто попуст, додаде Фидановски. (МИА)