Европски град со најдобра традиционална храна – и не е во Италија, Шпанија или Франција

Додека многу патници посетуваат земји како Италија, Франција и Шпанија поради храната, едно ново истражување открива некои изненадувачки дестинации во Европа што треба да ги посетиме ако сакаме да јадеме „автентични“ и „традиционални“ специјалитети.

Многу љубители на храна патуваат во Италија, каде што можат, на пример, да пробаат автентична неаполска пица во нејзиното родно место, Неапол, а тука се и Лион во Франција, познат по своите ресторани со Мишлен ѕвезди, како и сончевиот Сан Себастијан во Шпанија, познат по своите пинчос со морска храна покрај плажата. Сепак, ниту една од овие дестинации не го освои првото место како „најтрадиционална“ гастрономска европска дестинација.

Истражувањето на компанијата „Сага“ опфатило над 5.000 ресторани во 125 градови низ Европа, користејќи Гугл рецензии и анализирајќи колку често се појавуваат зборовите „автентично“ и „традиционално“, како и вкупните оценки од гостите. Резултатот покажал дека за најдобра локална кујна првото место и припаднало на Будимпешта – така можеби би било добро Лион и Сан Себастијан да ги оставите за друга прилика, пренесува „Тајм аут“.

Будимпешта, најпозната по барови во урнатини и термални бањи, сè повеќе се појавува како сериозен кулинарски центар, со нови Мишлен ѕвезди кои се додаваат на нејзината гастрономска сцена секоја година. Карактеристичните јадење вклучуваат обилен и ароматичен гулаш – богата супа од говедина и пиперки, пилешки паприкаш со кисела павлака, како и прочуените палачинки Гундел полнети со рум, натопени во суво грозје и ореви.

Питерџон Кресвел, експерт на порталот „Тајм аут“ за Будимпешта, препорачува резервација на маса во ресторанот „Борконји“ со Мишлен ѕвезда, кој служи иновативна унгарска кујна, или во „Розенштајн“, каде што традиционалните семејни рецепти се гордост на менито.

На второ место е Пиреја, Грција. Честопати во сенка на античката слава на Атина, овој крајбрежен град нуди исклучителна кулинарска понуда. Како најголемо пристаниште во земјата, Пиреја е рај за љубителите на морска храна: сочни школки, печен октопод, топли рибљи чорби и крцкав пржен бакалар се само некои од специјалитетите. За десерт, во понуда се свежи лукумадес – златни крофнички прелиени со мед, за кои се вели дека во нив уживале победниците на Олимписките игри во античка Грција.

Други европски градови кои нудат врвна „автентична“ кујна се издвојуваат Виена во Австрија, Валета на Малта и Прага во Чешка. Иако Италија сè уште има значајна гастрономска традиција, нејзините градови се рангирани значително пониско – Милано, на пример, се најде само на десеттото место.

Десетте европски градови со најдобра традиционална храна се:

1. Будимпешта, Унгарија
2. Пиреја, Грција
3. Атина, Грција
4. Виена, Австрија
5. Краков, Полска
6. Прага, Чешка
7. Валета, Малта
8. Варшава, Полска
9. Минхен, Германија
10. Милано, Италија