Започна изградбата на енергетскиот кабел Италија – Црна Гора

Во Црна Гора започна изградбата на енергетскиот кабел кој ќе ги поврзува електроенергетските системи на Црна Гора и Италија. Од италијанскиот брег кон Црна Гора веќе се поставени 136 km кабел, а вкупната должина од Пескара во Италија до ‘ртот Јаз изнесува 455 km.

Работите се изведуваат на дното на Јадранско Море на длабочини кои достигнуваат 1.200 метри, а кабелот има номинален капацитет за пренос на еднонасочна струја од 1000 MW.

„По пуштањето во погон на овој кабел, Црна Гора ќе има приходи од пренос на електрична енергија, а особено е значајно што со оваа инфраструктурна врска Црна Гора се интегрира во регионалниот и европскиот пазар на електрична енергија. Овој подморски далновод, трасира еден нов енергетски пат – Трансбалкански коридор, во кој се испреплетуваат интересите на Енергетската заедница и земјите од Западен Балкан“, изјави Мило Ѓукановиќ во обраќањето по повод започнувањето на работите на овој проект на територијата на Црна Гора.

Енергетскиот сектор на Црна Гора може да се пофали и со други добри вести. Европската Унија преку инвестициската рамка за Западен Балкан одобри 25 милиони евра заем за поддршка на изградбата на 400 kV конекција Плевља – Бајина Башта, додека, пак, на 29 септември е потпишан Договор за изградба на вториот блок на термоцентралата „Плевља“ со моќност од 254 MW.