Трапезоидна бетонска куќа во шума во Словачка

Архитектонското биро Ksa Studený ја проектирало оваа трапезоидна куќа од бетон и стакло за да го врами погледот на шумата во близина на селото Пернек во Словачка.

Вкопана во кос терен, куќата од 200 квадратни метри има стаклена фасада со целосна висина и на врвот со кров кој постепено ќе биде прекриен со растенија за да се сокрие од погледите.

„Инспирацијата беше да се изгради нешто слично на ловечка куќа“, изјави основачот на Ksa Studený, Jan Studený за Dezeen и додава: „Ова произлезе од самата локација, нејзината независност, позицијата на работ на селото и директната ориентација кон шумата наспроти падот на теренот“.

Домот е организиран на две нивоа, со дневна соба, кујна и трпезарија на приземје заедно со работен простор и главна спална соба, додека горе се сместени две детски спални соби.

Во склад со надворешната форма, основата е трапезоид, се стеснува како навлегува во ридот каде што се наоѓаат потемни сервисни простори и бањи, овозможувајќи им на дневната и спалната соба непречен поглед кон пејзажот.

„Проектиравме основа на куќа во форма на рамнокрак трапез, кој го одразува нејзиниот надолжен профил. Внатрешниот простор е слободен, поделен на две нивоа поврзани со скали“, објасни Studený.

Лизгачките врати со целосна висина и на приземјето и на првиот кат овозможуваат да се отвори домот, што води директно кон косата градина и шумата позади него.

Косата бетонска обвивка на домот е оставена изложена и однадвор и одвнатре, надополнета со минимален дрвен мебел и едноставна расвета.

Од двете страни се испакнати форми обложени со метал, кои содржат мал прозорец кој гледа на исток и стаклена врата на запад. Вратата овозможува пристап од првиот кат на надворешни скали кое водат нагоре кон местото за паркирање.

„Конструкцијата на куќата е бетонска обвивка без внатрешни столбови, направена од монолитен бетон. Единствената фасада на куќата е стаклен ѕид кон југ, преку кој комуницира со околината“, вели Studený и додава: „Пред куќата има две големи дрвја кои ја засенуваат оваа страна, така што нема потреба од дополнително засенчување“.