Старински мебел во ново руво – La Bambole

Иконичната дизајнерска колекција од 1972 година, добитник на Compasso d’Oro во 1979 година, се враќа на сцената како возбудливо редизајнирање – La Bambole…

Создадена како дело на Марио Белини, како дел од каталогот B&B Italia веќе педесет години, оваа колекција ги искористи новите дизајнерски опции кои ја прават уште поудобна и одржлива, погодна за денешното време. Колекцијата содржи четири парчиња: Bambola фотелја, Bibambola двосед, Bamboletto кревет, како и тросед, кој е освежен со подлабоко седиште и ново име – Granbambola.

„Задоволство ми е што повторно го посетив ова семејство на производи, бидејќи ми потврдува дека е сè, само не застарено. Всушност, ужива во својот живот, цвета и добива нови улоги, повторно се раѓа полно со ентузијазам, значења, декорации и оригинални елементи. Повторно го откривме неговиот шарм, луксузна мекост и нежност“, објаснува Белини.

Преполното седиште La Bambole пружа чувство на удобност и комфор. Формите на колекцијата се внимателно и грижливо адаптирани за да останат релевантни. Полиуретанот, заштитен знак на овој бренд, и понатаму им дава структура и мекост, иако сега, за разлика од минатите изданија, е рециклиран. Термопластичните еластомери додаваат форма и дефиниција на сите парчиња мебел, заедно со комфорот и транспарентноста. Поставата која ги крие сите овие елементи е добиена од рециклирани ПЕТ материјали. Сите овие освежувања овозможуваат парчињата Le Bambole целосно да се расклопат и лесно да се рециклираат.

Заедно со реизданието на класичната колекција, дојдоа и нови опции за тапацир. Sila е нежна ткаенина достапна во осум бои, додека ограниченото издание Manila доаѓа со цветен дезен со големи рози на црна или бела подлога. Колекцијата Le Bambole може да биде обложена и со висококвалитетна кожа Kasia.