Rita House во Аргентина, чувство дека се живее во шума

Аргентинското архитектонско биро Estudio Fernandez Renati проектирало приватна куќа со тенки и заоблени настрешници во шума во Ituzaingóu, Аргентина.

Наречена Rita House, куќата од 692 квадратни метри е сместена во бујна шума и обликувана според постоечките карактеристики на топографијата.

Куќата е реализирана како дел од втората од серијата органски куќи, како што се Chloé, Borja и Filippa.

Бирото ги следело истите принципи во сите куќи, „развиваме концепт кој лежи во материјализирање и повторување на збир на проектни операции кои во нашето биро ги нарекуваме ‘Housing Manifesto‘“.

Според архитектите, некои елементи на проектот одиграле важна улога во проектирањето, како што се обезбедување внатрешен двор, вкрстено осветлување и вентилација, развивање просторни односи, ограда од мебел, користење на автохтони материјали, давање архитектонски насоки и пристап до кровот.

Куќата се наоѓа на локација со површина од 2.500 квадратни метри на периферијата на Буенос Аирес.

Бидејќи доминираат стари дрвја, архитектите направиле се да ги зачуваат дрвјата на локацијата.

Поради падот на теренот, половина од приземјето е поставено од другата страна на падината и обложено е со тули. Вториот кат е поставен на врвот на волуменот обложен со тула и опкружен со стакло од подот до таванот.

За да се создаде флуидна транзиција, проектантите осмислуваат оска за пациото опкружено со рампи кои ги поврзуваат покриените простори со останатите полупокриени. Според архитектите, оваа оска создава флуидна транзициона рута помеѓу просторите наменети за живеење.

Тенка и заоблена настрешница од бетон, е уште еден континуиран елемент што ја дефинира куќата. Настрешницата, ослонета на тенки челични столбови, продолжува до другата страна на куќата.

„Куќата е делумно вкопана во терен, изложена е на сонце во текот на денот“, велат од бирото.

„Одлучивме да го замениме традиционалното лоцирање на просторот, приватните простори се на приземје, а заедничките, социјалните на горниот кат“.

Архитектите ги карактеризирале собите со приватен, мирен и затворен простор, што дава чувство дека сте во шума.

Дневната соба е подигната на висина на крошните на дрвјата и има вкрстена вентилација и осветлување во текот на денот, од овој простор овозможен е пристап до целата куќа.

Поради следењето на природниот пад на теренот, има висинска разлика во нивоата внатре, пред да се влезе во дневната соба. На второто ниво, сместена е работна соба со независен пристап и просторија за гости.

Архитектите избирале едноставни и ефикасни материјали, бетон, тула и дрво, давајќи му фокус на природното опкружување.