Ресторан како од земјата на бајките

Во полскиот град Познан се наоѓа ресторан под име Weranda, кој пред 15 години започнал како мал кафе бар, чии декор бил инспириран од рустикалните домови со shabby chic уредување и бујната зелена околина. Денес, зад ова име како семеен бизнис стои врвен ресторан, lounge бар, вински бар и една мала продавница со деликатеси во која може да се купат пецива, колачи и домашни џемови. Она по што Weranda се издвојува од повеќето други ресторани, кафулиња и барови е ентериерот што изгледа како да сте влегле во земјата на бајките.

Секоја сезона ентериерите на  Weranda се менуваат во согласност со годишните времиња, а посебно се издвојува во пролет, кога ентериерот изгледа како рајска градина. Сите декорации се рачно изведени од страна на сопствениците и вработените, и сите подеднакво се вклучени во идеите и нивното извршување. Откако ќе ги тргнат декорациите, сопствениците ги проследуваат на детските болници и домови, за да им се разубави престојот на децата.

Прекрасниот амбиент на ресторанот го следи и врвна услуга според њујоршките cool клубови и со индустриски „вкус“. Недопрената природа со диви цвеќиња и дрвја се секогаш надополнети со саксии од лалиња, големи вазни со кали, глинени садови со свежи билки за зачини, лилјани, и секако шармантни ретро маси и столици кои потсетуваат на изгледот на романтичните рурални куќи од бајките.