Размена на искуства од областа на паркирањето меѓу претставници на Струмица и Софија

Претставници на Јавното претпријатие „Паркиралишта Струмица“ престојувале во дводневна посета на Центарот за градска мобилност на Софија, Република Бугарија, информира 24Струмица.

Посетата се реализирала на покана на директорот на Центарот, Симеон Арнаудов, а  главната цел била размена на искуства во делот на паркирањето.

-Имајќи во предвид дека Струмица го понуди најдоброто од нашата земја на своите сограѓани во делот на паркирањето изминатиов период, имаме обврска како менаџерски тим да ги разгледаме и искуствата од поразвиените градови, за да можеме да одговориме на предизвиците кои ни претстојат во делот на проширувањето на паркинг зоните,  воведувајќи олеснување на сообраќајот во мирување. Софија е милионски град и веќе години наназад функционира организираното зонско паркирање без никаков проблем. Бидејќи во многу нешта постојат сличности во системите на плаќање, издавање дозволи и комплетното организирање на паркинг просторите, мене ми претставува посебна сатисфакција признанието од страна на г-динот Арнаудов дека Струмица успеала да имплеменира систем кој по начинот и видот е препознатлив за големи метрополи – истакна Верица Узунова, директор на ЈП „Паркиралишта Струмица“.

Во рамките на посетата беа презентирани веќе развиените новитети во Софија во делот на паркирањето, а се одржа и средба со бордот на директори на Центарот за градска мобилност во чиј состав влегува и јавниот превоз.