Насловна / Архитектура / Продолжува конзервацијата во Стоби

Продолжува конзервацијата во Стоби

На археолошкиот локалитет Стоби во тек се истражувања на неколку објекти, дел од годишната програма за работа. Во тек се конзервација на архитектонските остатоци од резиденцијален и комерцијален кварт од рановизантиски период, доистражувања на Римскиот театар, археолошки доистражувања и конзервација на фрескоживописот од Старата епископска базилика и конзервација и реставрација на Јужен градски бедем и Јужна Порта.

1

5

Директорот на Националната установа Стоби, г-дин Спасе Перовски по повод овие активности, изјави : „При работите на Јужен градски бедем и Јужна градска порта има возбудливи откритија и наоди, кои укажуваат на точна временска рамка кога портата била затворена и ставена надвор од функција. Покрај работата на ѕиданите делови на Римскиот театар, продолжија и работите на конзервацијата на мермерните елементи од украсената архитектонска позадина на театарската сцена, со пополнување на пукнатините на блоковите и спречување на нивното понатамошно уништување“.

При тоа, тој додаде дека сите проекти кои се реализираат, се со средства обезбедени од годишната програма на Министерството за култура. Од музејската активност се работи на конзервација и реставрација на керамички садови, мозаици, стаклени предмети, метални предмети. Се работи и на илуминацијата на археолошкиот локалитет, што ќе овозможи ноќни посети на туристите, кои ова лето се вратија на локалитетот, по две години пауза поради ковид пандемијата. Тука се реализираат и меѓународни проекти, со цел Стоби да биде целосно истражен.

Работите на непосредна заштита, се одвиваат на трите најоштетени радијални ѕидови и сегменти од циркуларниот ѕид IV, кај кои постоеше сериозна опасност од рушење. Покрај работата на ѕиданите делови на театарот, продолжија и работите на конзервацијата на мермерните елементи од scaenae frons со пополнување на пукнатините на блоковите и спречување на нивното понатамошно уништување. Работите на scaenae frons се стопирани поради високите температури и ќе продолжат во септември сè до комплетното реализирање на преостанатите одобрени средства.

3

4

„Работиме на проект каде учествуваат институции од седум држави. Поентата е да создадеме нови искуства, кои ќе ја привлечат младата публика назад, на овој локалитет“, рече Димитар Николовски, вработен во Стоби.

Летово на Стоби завршија и две меѓународни школи, кои ги посетуваа студенти од странство. Во јуни беше 10-тата меѓународната работилница за керамика, стакло и конзервација на мозаик, а во јули 11-тата меѓународна школа за археологија. И двете се организирани заедно со Националната установа Стоби и Фондацијата Балканско наследство од Софија.

Испрати коментар

Вие можете да ги користите следните HTML ознаки: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Scroll To Top