Од депонија до зелена населба: Урбана регенерација на Багдад

На местото на поранешен воен камп во Багдад, никнува нова еколошка населба, која ќе се простира на дури 10 милиони квадратни метри и ќе биде опкружена со шума од милион стебла. Проектот наречен Baghdad Sustainable Forests е дело на реномираното архитектонско студио Gensler, а инвеститор е компанијата Emkanat.

Gensler го замислува овој амбициозен генерален план како комбинација од урбана регенерација и еколошка реставрација. Местото каде што ќе се наоѓа населбата претходно се користело како воен камп и депонија, со повеќе од 45 милиони тони натрупано ѓубре.

Сега тој напуштен простор ќе биде трансформиран во модерна урбана зона со станбени, деловни и комерцијални објекти, а се тоа ќе биде врамено со шуми, паркови и зелени коридори.

Според Ian Mulcahey, глобален директор за урбанистичко планирање во Gensler, проектот има за цел да го ревитализира запуштеното земјиште преку создавање мултифункционални населби и на Багдад да му го врати значењето како центар на урбана отпорност и локален развој. Тој истакна дека оваа иницијатива ќе послужи како светилник на обнова за еден од најстарите градови во светот.

Зелениот кварт ќе биде поделен на низа населби, кои ќе понудат комбинација од простори за образование, рекреација и бизнис. Во нив ќе се изгради 1,5 милиони квадратни метри комерцијална и малопродажна инфраструктура.

Планирани се плоштади и улици во сенка погодни за пешаци, велосипедисти и корисници на електрични тротинети, кои ќе поврзуваат различни делови од областа.

Меѓу највпечатливите архитектонски елементи ќе бидат портата Al Rasheed висока 260 метри, како и River Gateway, која повторно ќе отвори дел од реката Тигар за јавноста.

Меѓу другите клучни објекти ќе биде Националниот павилјон, замислен како симбол на граѓанска обнова, кој ќе достигне висина од 110 метри. Проектот вклучува и голем број тематски шуми, меѓу кои се Шумата на уметноста и културата, Шумата на здравјето и благосостојбата, Шумата за деца и забавата и Шумата на спорт и фитнес.

Како што истакнува Mulcahey, пренамената на овој запуштен простор во жив шумски дистрикт има симболична тежина бидејќи местото на еколошко уништување се претвора во знак на преродба.

Тој додава дека поголемиот дел од површината ќе остане покриена со зеленило, а некои сегменти ќе бидат зачувани во нивната природна форма со цел да се поддржи биолошката разновидност. Во други делови ќе бидат уредени патеки, градини и јавни простори за секојдневна употреба.