Најголемата хидроелектрана во Африка пуштена во погон со полн капацитет

Етиопија ги пушти во работа сите 13 турбини на најголемата хидроелектрана во Африка чиј полн капацитет е 5.500MW. Станува збор за хидроелектрана на Синиот Нил, која веќе обезбедува електрична енергија за милиони луѓе. Но, земјите кои се наоѓаат низводно од браната, првенствено Египет и Судан, стравуваат дека ќе имаат проблеми со водоснабдувањето.

Изградбата на т.н „Голема брана на етипоската ренесанса“ (Grand Ethiopian Renaissance Dam – GERD) започнала во 2011 година. Браната е долга 1,78 километри, висока 145 метри и изградена е од 11 милиони кубни метри бетон. Акумулацијата потопила огромно подрачје, а владата тврди дека таа ќе обезбеди стабилно снабдување со вода за наводнување низводно и дека ќе помогне во контролата на временските непогоди како поплави и суши. Првата турбина е пуштена во 2022 година, потоа сукцесивно се пуштани во погон и другите турбоагрегати, додека од неодамна во функција се ставени сите 13 турбини.

Оваа мегаградба е најголема по енергетскиот капацитет во Aфрика и меѓу 20-те најголеми хидроелектрани во светот. Изградбата чинела 5 милијарди долари, при што државата обезбедила 91% од средствата, а остатокот е обезбеден од страна на граѓаните кои купувале обврзници и донирале пари.