Порта3 – градежништво, архитектура и екологија Порта3 – градежништво, архитектура и екологија
Во просторот наречен „Сквер“ на Архитектонскиот факултет Скопје на 02.02.2018 година се отвори изложба на студентски конкурсни трудови на тема „Индустрија во град“, кој конкуср обнова на фасадите на објектите на Цементарница АД Усје – Скопје заедно го организираа Архитектонскиот факултет и Цементарница Усје „Титан“. На изложбата Цементарница УСЈЕ ги додели наградите. Комисијата составена од претставници на Архитектонскиот факултет и Цементарница УСЈЕ додели вкупно четири награди за најдобри проекти. Две од нив припаѓаат на тимот составен од: Љубен Трајаноски, Мирослав Пејовски, Сашо Андријевски, Јосиф Николовски и Урош Николоски; вториот тим го сочинуваат: Валбона Фејза и Сања Аврамоска и третиот добитнички тим се студентите: Христина Мијалчева и Синиша Павловски.
Задачата на конкурсот беше студентите да изработат решенија за обнова на фасадите на објектите на силосите, преку предлози за површинска обработка, колоритно решение и ноќно осветлување.
На свеченоста се обрати директорот на УСЈЕ, Борис Хрисафов кој се заблагодари и честиташе на студентите и Архитектонскиот факултет за убавата соработка и изрази надеж дека во иднина ќе имаат и нови можности за соработка.
На присутните им се обрати и деканот на АФС д-р Огнен Марина кој изјави „Оваа соработка со УСЈЕ е навистина исклучителен пример, кој треба да се промовира и следи. Ваквите проекти докажуваат дека успешните заеднички проекти на реалниот сектор и образованието не само што се можни, туку и обезбедуваат висок бенефит за двете страни – индустријата добива контакт со свежите идеи на иднината, а студентите можност да работат на реална основа и така да стекнат драгоцено искуство уште во текот на образовниот процес“.
