„Москва денес“ изложба во Музејот на Град Скопје

Во Музејот на Град Скопје на 30 јануари со почеток во 19 часот се отвори изложбата „Москва денес“. Изложбата ја отвори амбасадорот на Руската Федерација во РМ г-дин Олег Шчербак, Градоначалникот на Скопје г-дин Петре Шилегов и директорката на Музејот на Град Скопје г-ѓа Фросина Зафировска.

Изложбата „Москва денес“ се одржува во рамки на одбележувањето 24 години од воспоставувањето на дипломатските односи меѓу Русија и Македонија и е во организација на Амбасадата на Руската Федерација во РМ и руската државна агенција „Россотрудничество“ со поддршка на Град Скопје и Музејот на Град Скопје.

Музејот беше претесен да ја прими публиката која дојде да ја погледа изложбата на фотографии од Москва, град кој по многу нешта е еден од најважните градови во светот.

Москва е град кој е престолнина и на царска и на модерна Русија, град кој е важен научен, културен, политички, стопански и туристички центар на еден значаен дел од светот. Москва е ризница на култура која го чува богатството и древното наследство во своите величенствени зданија.

Град кој се менувал, растел низ вековите и град кој ја зачувал својата автентичност паралелно со сите историски настани и превирања кои се случувале и кои се огледуваат во архитектурата на градот. Најголемата европска метропола претставува спој на на традиционална Русија, советскиот период и модерните, современи струења во сите сегменти на животот на градот. Град со најголема концентрација на многу знаменитости на мал простор.