Малите населени места ќе добијат пречистителни станици

Отпадната вода од домаќинствата во селото Марино веќе две години се пречистува во мала пречистителна станица и потоа се употребува за полевање на земјоделските површини, а наскоро овој технолошки благодат ќе го почувствуваат и жителите на селата Kадино и Илинден, пишува Дневник.

Според законските одредби за животната средина, секое населено место со над 2.000 жители мора да ги прочистува отпадните води пред да ги испушти назад во околината, а општина Илинден меѓу првите се нафати да го совлада предизвикот.

Сите три станици се со капацитет од 1.250 еквивалент жители. Таа во Марино е изградена под земја, а новите две ќе бидат надземни.

– Се одлучивме за вакви станици, бидејќи се најефикасни и повеќе земји од ЕУ користат ваков начин на одведување на отпадните води – вели Дејан Богдановски, раководител на Одделението за локален економски развој и јавни дејности. Тој истакна дека засега станиците и колекторските системи во селата ги градат во деловите што се најниски и често се поплавуваат.

Професорот Џоко Kунгуловски од Природно-математичкиот факултет, кој е проектант на станиците, вели дека станува збор за затворен тип на аеробни станици кои трошат минимум енергија, не создаваат бучава, ниту смрдеа.

– Тие лесно се одржуваат и нема потреба од секојдневно ангажирање на луѓе. Ќе се користат два контејнери, поставени на бетонска подлога. Kога едниот прочистува, другиот мирува и обратно. Прочистувањето се врши со помош на бактерии, кои се хранат со отпадните материи во водата и така ја прочистуваат. Тињата што се создава ќе се користи за производство на органско ѓубриво – вели Kунгуловски.

Во Илинден е изградена бетонската подлога и наскоро ќе се постават контејнерите. Во Kадино контејнерите се поставени и се тестира станицата.