Креативен спој на неутралните бои и графичката уметност во современ ентериер

Модерниот ентериер на апартманот што се наоѓа во Стокхолм е проектиран од страна на дизајнерот за внатрешно уредување Duc Jimmi од дизајнерското студио Talenti Design. Специфично за овој ентериер е тоа што ги содржи аспектите на скандинавскиот дизајн, а тоа се функционалноста, природните материјали и креативната употреба на силни бои.

Просторијата за дневен престој иако не е голема по својата површина, правилниот распоред на елементите и боите овозможува просторот да функционира беспрекорно. Тука се застапени најчесто пастелни бои со доминација на теписонот во риги и графичката уметност на ѕидовите. Дополнителна свежина на просторот му дава контрастот од портокаловата боја на фотелјите.

Кујната е целосно бела, а од мебелот застапени се познатите столчиња на Eames. Над трепезариската маса висат два лустери во црна боја, надополнети со црните рамки на сликите поставени над неа.

Останатите простории од апартманот се одликуваат со едноставност и комфорност. Во спалната просторија доминира црна, бела, сива и портокалова боја. Во детската соба застапена е розовата боја на дел од мебелот и прекривките. Ѕидовите се во бела боја со цел просторијата визуелно да изгледа поголема и да се надомести за количеството светлина што не е доволно овозможено преку малите отвори.