Канцеларијата на студиото WOA во Индија каде сè е зелено

WOA Architects го проектирале своето студио врз основа на еко-принципи, користејќи рециклирани материјали и растенија.

Наречена WOA Second Home, канцеларијата се наоѓа во Кочи и зафаќа поранешен магацин кој претходно се користел за складирање плочки. Со цел да се истакне „потребата од намалување на отпадот во архитектурата“, проектот користел рециклирани или депониски материјали во дизајнот на канцелариите, вклучувајќи бетонски плочи, ПВЦ цевки, стар мебел и акрилни плочи.

„Ја истакнавме вредноста на материјалот што често се фрла на депониите. На пример, плочки со необичен облик најдоа место во бањата, а комбинацијата на различни елементи и дезени вдахна нов живот во просторот“, велат архитектите.

Од влезот се влегува во главниот деловен простор, кој содржи бетонски маси, простор за состаноци и табла со проекти. За поинтимно работење, во близина има мали преградени простори опкружени со растенија. „Работната област е проектирана да поттикнува тимска работа, но има и повеќе катчиња за приватност каде што можете да се концентрирате на деталите на проектите“, вели основачот на WOA.

Идејата била да се создаде работен простор кој изгледа како „втор дом“. Тоа е евидентно во дизајнерските детали, кои даваат приоритет на удобноста, естетското задоволство и чувството на припадност на студиото.

Црните светилки на таванот се направени од ПВЦ цевки, а саксиите се излеани од бетон. Старите подови од плочки се задржани, пукнатините отстранети, а дупките се исполнети со микроцемент, создавајќи контрастни темно сиви уметоци. Отфрлен стар мебел е користен низ студиото, а повеќе од 100 видови на домашни растенија се поставени низ канцеларијата за да му дадат на работниот простор пријатно, домашно чувство.