Идеја која спасува животи: Пешачки премин со ЛЕД осветлување

Како пешаците да бидат повидливи? Французите имаат добра идеја и ги тестираат своите системи од 2017 година. Сега е донесена и официјална уредба која овозможува хоризонтална сигнализација со ЛЕД осветлување на патиштата или тротоарите. Како сето тоа функционира? Преку вообичаените ознаки на асфалтот, како што се обележените пешачки премини, се додава динамичка светлосна сигнализација. Тоа се плочки со дебелина од 6 mm, кои се состојат од неколку слоеви, вклучувајќи и ЛЕД ленти.

Овие објекти се проектирани да го издржат притисокот од минувањето на многу возила, површината не им е лизгава, па не им пречат нa пешаците додека одат преку нив. Може трајно да се вградат во коловозот или едноставно да се залепат на асфалтот. Се разбира идејата е пешаците да бидат повидливи ноќе или во лоши временски услови. Целиот систем е креиран од страна на компанијата Colas. Благодарение на повратните информации собрани во текот на тестирањето, Colas постојано го подобрува својот систем. Хоризонталната сообраќајна сигнализација со осветлување се активира кога пешаците се во негова близина, и на тој начин ги предупредува возачите.