Порта3 – градежништво, архитектура и екологија Порта3 – градежништво, архитектура и екологија
Градежната индустрија сè повеќе интегрира роботи за да ги забрза и поедностави работите, не само за време на изградбата, туку и во фазата на планирање. Додека во претходните години вниманието беше насочено кон роботите што поставуваат тули или 3Д печатени куќи на лице место, сега и геодетските работи добиваат свои високотехнолошки помагачи.
Компанијата Civ Robotics од Сан Франциско развила автономен робот наречен CivDot кој значително ги забрзува припремните работи на градилиште.
Додека традиционалните геодетски тимови успеваат да обележат помеѓу 200 и 450 точки дневно користејќи стативи и мерни ленти, CivDot може да обележи дури 3.000 точки или околу 27 километри линии за само еден ден, што го прави осум пати поефикасен од човечките екипи.
Овој робот функционира така што прима CSV фајл со координатите на проектот, а потоа автономно се движи низ градилиштето, обележувајќи прецизни граници со спреј или ласерски зрак.
Иако самиот робот ги поставува почетните ознаки, работник оди зад него и додава физички маркери како знамиња или столбови. Civ Robotics истакнува дека нивната технологија постигнува прецизност од околу осум милиметри.
CivDot има вградени звучници кои изговараат описи на точки и користи батерија што трае до осум часа. Во моментов, повеќе од 100 вакви роботи се распоредени на градилишта низ целиот свет.
Компанијата може да се пофали и со финансиски успех – неодамна објавија дека достигнале профитабилност и обезбедиле 7,5 милиони долари во рамки на инвестициска рунда од Серија А предводена од фондот AlleyCorp.
Со ова вкупната инвестиција во Civ Robotics пораснала на 12,5 милиони долари. Благодарение на овој капитал, Civ планира да ја прошири употребата на своите роботи на градилиштата низ Европа, Блискиот Исток и Африка.
Иако роботите сè уште не се подготвени целосно да го заменат човечкиот труд на градилиштата, јасно е дека тие ги забрзуваат процесите и поставуваат нови стандарди за прецизност и ефикасност во градежната индустрија.
