Dalmatia Tower, највисоката зграда во Хрватска добитник на меѓународното признание

Највисоката зграда во Хрватска, облакодерот Dalmatia Tower висок 135 метри, добитник е на меѓународното признание на European Property Award во категоријата најдобро архитектонско решение за комерцијална висококатница.

„Мило ми е што проектот беше признат од меѓународното жири. Сметам дека Dalmatia Tower значително придонесува за визуелниот идентитет на Сплит, а ваквите меѓународни признанија само придонесуваат за препознатливоста и квалитетот на Сплит како дестинација, пред се затоа што хотелот Marriott е одличен додаток на понудата на градот. Квалитетот на нашиот проект, висококатната деловна зграда, како што го нарече жирито, ги надминува тесните рамки на Сплит, Далмација и Хрватска и нè става покрај врвните достигнувања во цела Европа, “ изјави архитектот Ото Бариќ, автор на проектот.

European Property Award е синоним за извонредност во секторот на недвижности, а на церемонијата во Лондон беа доделени награди во четири категории: архитектура, градежништво, ентериер и работа со недвижности, а најдобрите меѓу нив ги бираа повеќе од 80 меѓународни судии.

Дури 42 судии учествуваа во одлучувањето за најдобрите архитектонски проекти, меѓу кои и Yama Karim, партнер во познатото њујоршко студио Libeskind te Matt Gaskin, директор на школата за архитектура на Универзитетот Oxford Brookes.

Летово управата на градот Сплит одби да и издаде дозвола на компанијата Westgate tower за измена на градежната дозвола за 27-катната Dalmatia Tower, бидејќи извршените работи на последниот кат се разликуваат од она што е претставено во конкурсното решение.

„Обликовното решение на последниот кат во конкурсното решение беше различно, но не станува збор за големо отстапување“, изјави раководителот на Управното одделение за просторно планирање, уредување и заштита на животната средина во Градската управа, Тео Војковиќ.

Dalmatia Tower е највисоката деловна кула во Хрватска, со вкупна висина, вклучувајќи ја и антената, 135 метри. Одбивањето да се издаде дозволата се случи за време на завршните работи и во пресрет на претстојниот технички преглед и официјалното пуштање на кулата најавено за оваа есен.

Сплитскиот градоначалник Ивица Пуљак го коментираше одбивањето да се издаде градежна дозвола со зборовите дека „правилата важат за сите подеднакво – и за продавачите на пазарите и за најголемите инвеститори, за трафика и за највисок облакодер во Хрватска“.

Спорот меѓу општината и инвеститорите продолжува, а последниот збор може да го има Министерството за градежништво. Дали политиката повторно ќе му попушти на капиталот, се прашуваат во Хрватска?