Boeing вложува стотици милиони долари во развој на беспилотно летечко такси

Компанијата Boeing ќе вложи дополнителни 450 милиони долари во фирмата Wisk, за да го поддржи развојот на идните беспилотни летечки такси возила, објави американскиот воздухопловен гигант. Калифорниската фирма Wisk, која е во сопственост на Boeing и Kitty Hawk, компанија за воздухоплови покрената од коосновачот на Google Larry Page, е една од неколкуте десетици компании кои развиваат електрични автомобили со вертикално полетување и слетување (eVTOL). Се разликува од другите по тоа што е фокусирана на автономен лет, односно на летечко возило без пилот.

Одлуката да се прескокне генерацијата на летечки автомобили со кои управува пилот, а кои се развиваат од страна на независните стартап компании и некои групи за воздухопловство, значи дека беспилотните возила на Wisk ќе бидат во употреба подоцна, односно после 2024 година, која е утврдена од страна на повеќето конкуренти за летечките автомобили со пилот.

Boeing одби да го наведе рокот за лансирање на своето патничко возило од шестата генерација, а некои извори од таа индустрија откриваат дека во оптек е идејата неговата сертификација да започне околу 2028 година. Од Boeing тврдат дека тоа ќе биде прво автономно воздушно возило кое ќе биде сертифицирано во САД.