AirBubble е интерактивно игралиште во Варшава кое го прочистува воздухот

Игралиштето изградено како оаза на свеж воздух за децата кои живеат во еден од најзагадените европски градови, Варшава.

Проектирано од лондонското биро ecOLogicStudio, AirBubble е интерактивно игралиште кое се напојува со соларна енергија и вклучува еден многу невообичаен инженерски елемент – микро алги за прочистување на воздухот.

Секој пат кога детето ќе скокне на некоја од пумпите за вода во паркот, се активираа 52 реактори за микро-алги, кои им овозможуваат на растенијата да складираат СО2 и ослободуваат со голема брзина свеж кислород на игралиштето.

Истовремено, звук на меурчиња на алги е додаден за да се создаде мирна атмосфера и да се поништи загадувањето од бучавата од прометните сообраќајници во тоа подрачје.

Од отворањето на игралиштето во мај, оваа технологија веќе докажа дека ги намалува нивоата на азот и цврсти честички до 83 отсто, филтрирајќи околу 200 литри загаден воздух во минута.

Сместено до Центарот за наука Коперникус (Centrum Nauki Kopernik), игралиштето е опремено со јажиња, ножни пумпи и живи зелени и црни сфери.

„Неискористена е вредноста на внесување на био-интелигенцијата на природните системи во градовите, претворањето на зградите во живи машини кои произведуваат енергија, складираат СО2 и го чистат воздухот“, вели Marco Poletto, ко-основач на ecoLogicStudio. „За да го постигнеме ова, треба да размислуваме за живиот свет како дел од тековната дигитална револуција: природата станува дел од новата био-паметна инфраструктура.”

Во иднина, ecoLogicStudio планира да создаде повеќе AirBubbles игралишта низ целиот свет.