Речиси 3 милиони работни места во Западен Балкан се загрозени од климатските промени и зелената транзиција

Последиците од климатските промени на Балканот, како и во остатокот од Европа, не се апстрактни – тие се секојдневен проблем, го загрозуваат здравјето, ја продлабочуваат нееднаквоста, претставуваат закана за работните места и се товар за отпорноста на некои од најранливите економии во Европа. Регионот на Западен Балкан веќе се соочува со последиците, но сега мора да направи исчекор и да спроведе некои решенија. Во исто време, обврската за напуштање на фосилните горива, односно спроведувањето на зелената транзиција, претставува дополнителна закана за бројни работни места во овој регион. Речиси 3 милиони работни места на Западен Балкан се директно или индиректно изложени на климатските шокови или се загрозени поради зелената транзиција.

Се очекува регионот да изгуби до 16% од својот БДП поради влијанието на екстремните временски услови. Само во 2014 година, поплавите „избришале“ над 51.000 работни места. Поплавите во Босна и Херцеговина во 2024 година раселиле над 1.000 домаќинства и принудиле повеќе мали компании да бидат затворени. Црногорскиот брег се соочува со растечки закани од пожари и ерозија на земјиштето. Во Македонија и Косово, честите топлотни бранови ја прават работата во земјоделството и градежништвото потешка и поопасна. Во Албанија, само во 2017 година, во поплава се изгубени 15.000 хектари посеви. Климатските промени не ги погодуваат сите земји подеднакво. Најранливите се секогаш првите кои се на удар и кои се најтешко погодени.