Поранешна машинска работилница во Грција претворена во стан

Сместен во областа Ермионида, Грција, Apartment V е поранешна машинска работилница со високи тавани на приземје и со површина од 75 квадратни метри, трансформирана во живописен простор за живеење по проект на бирото Naki Atelier. Станот се протега помеѓу локална улица и двор. Главната фасада е стратешки проектирана за да се оптимизира влезот на природна светлина во просторот, бидејќи тоа е единствениот бочен извор на дневна светлина што влегува во станот.

Реновираниот простор е поделен на две основни простории, приватен дел кој вклучува две спални соби и бања, и голем отворен мултифункционален дневен простор. До приватниот простор се стигнува преку ходник кој продолжува на линеарниот дел од кујната. Другиот дел од кујната што го сочинува јадрото на куќата ја вклучува трпезаријата со висечка челична конструкција над неа и галерија.

Вака поставената галерија создава дополнителен простор за одмор, а воедно го формира и „покривот“ на кујната, како и на трпезаријата. Покрај тоа, ја намалува висината, создавајќи многу попријатна атмосфера. Искористувајќи го постојниот висок таван од 4,20 метри, галеријата е замислена како отворен интегриран простор помеѓу две нивоа, каде што природната светлина меѓусебно поврзува повеќе простори.

Галеријата, како архитектонско парче мебел, е замислена како клучна карактеристика на дизајнот и вклучува повеќе услуги, вклучувајќи ја кујната, трпезаријата, просторот за релаксација и просторот за складирање. Во знак на сеќавање на неговата прва употреба, новиот простор се состои од црвени челични конструкции и мебел по мерка од не’рѓосувачки челик. Зелен мермер, дебел текстил, плочки во смели бои и сирова брезова иверица се избрани за да го зајакнат современиот карактер на станот.