Глинената војска со преку 7.000 скулптури на првиот кинески цар

Додека пред четири децении еден вреден кинески селанец недалеку од градот Џијан копал бунар, не ни сонувал дека ќе открие вековната тајна и ќе биде протагонист на едно од најголемите археолошки откритија досега. Откритие кое сè уште е обвиткано со превез од големи мистерии и ги инспирира светските научници да дадат се од себе за да откријат некои од нив.

Воините на Сјен или Глинената војска е колекција од преку 7.000 скулптури на војници и коњи, направени од глина, најдени во гробницата на првиот цар кој ја обединил Кина во 221. година п.н.е., Ќин Ше Хуанг.

Сите скулптури се во природна големина, а откриени се во март 1974. година на 33 километри од градот Сјен во провинцијата Шанси од локален фармер од Сјен. Глинената војска е пронајдена на околу 1.5 километри од гробот на Ќин Ше Хуанг на три нивоа. Прво се ископани скулптурите кои се наоѓале на длабочина четири до 8 метри, музеј под име Музеј на првиот цар на династијата Ќин поставен е над урнатините и отворен за јавноста во 1979 година, а целиот музеј е комплетиран во 1994 година.

Владетелот на Кина, Ќин Ше Хуанг, наложил да се направи Глинената војска со задача да го чува гробот на царот, неговото вечно почивачиште и да го следи во неговите посмртни походи. Кога умрел царот заедно со него се погребани и скулптурите, бидејќи се верувало дека така царот со него ќе има војска со која ќе заповеда. Скулптурите гледаат кон исток и се наоѓаат во борбени формации. Секоја скулптура е единствена, посебен впечаток остава тоа што секоја има персонализирани црти на лицето, практично нема две исти. Секоја фигура е направена со неверојатна прецизност и неодоливо наликува на скаменети воини. Скулптурите се вооружени со лакови и стрели, копја, мечеви и др. Во 1980 година откриени се две обоени, бронзени кочии 20 метри западно од гробот на царот. Секоја се состои од 3.000 разни делови и ја влечат четири коњи.

Во 1987 година УНЕСКО ја прогласи Глинената војска за светстко културно наследство.

Војската од глина е во вистинска смисла на зборот, армија, добро организирана и стратешки идеално поставена. Зад повеќе од 200 стрелци кои стојат во првите редови стојат бројни војници вооружени со копја и слично долго оружје со зашилени врвови. Армијата е комплетирана со воени кочии влечени од коњи, исто така направени во природна големина. Нема сомнеж дека ако на кинескиот император му била потребна постхумна армија, подобра не можел да замисли.