Зграда прилагодена според локацијата

Обликот на оваа деловна зграда е наметнат од самата локација. Бидејќи местото каде што треба да се изгради не може да ја поддржи тешката конструкција поради подземната железница, предлогот е зграда која има заоблена кривина во својот централен дел. Всушност, централниот дел е проблематичен, па зградата е стеснета, додека на краевите се шири по целата ширина.

Во објектот ќе биде сместено седиштето на францускиот медиумски гигант Le Monde Group. Првичниот проект вклучувал две згради и празен простор меѓу нив, но компанијата одлучила дека е подобро седиштето да биде во една зграда. Проектот го направи Snøhette во соработка со локалната фирма SRA и фирмата за внатрешно уредување Archimage.

Првиот предизвик кој се најде на проектантската фирма бил да дизајнира и изгради зграда во која целиот технички систем на зградата ќе биде умно вметнат во конструкцијата на самата зграда. Вториот предизвик бил самата локација, која може да издржи одредена количина тежина, и тоа само на двата краја на локацијата. Соодветно на тоа, одговорот на овие предизвици бил да се работи на идејата за спојување на првите планирани две згради во една, истовремено премостување на делот што не може да носи голема тежина. За оваа цел е создадена челична конструкција. Оваа структура за премостување во форма на лак буквално би направила скок од едната и од другата страна на локацијата. Тоа е многу тежок инженерски потфат бидејќи зградата е потешка од Ајфеловата кула. Сепак, ова е направено со цел да се создаде уникатна зграда со динамичен изглед што ќе ги обедини различните наслови на списанијата и весниците на Le Monde Group.

Зградата се карактеризира со голем лак и привлечна пикселирана фасада која содржи над 20 илјади парчиња стакло распоредени во серија од 772 шаблони. Фасадата е создадена со цел да се промени нејзиниот изглед во зависност од промената на времето и светлината. Исто така, шаблоните на фасадата треба да се однесуваат на печатените букви во весници и списанија. Надворешниот дел е поплочен со бетон и има интегрирано ЛЕД осветлување.

Во рамките на заоблениот дел има простор за седење и паркирање велосипеди. Зградата зафаќа површина од 23 илјади квадратни метри распоредена на осум ката. Поголемиот дел од просторот го окупираат канцелариите на Le Monde Group, но има и рецепција, библиотека, конференциска сала, кафетерија за персонал, ресторан и простории за состаноци. Покрај тоа, зградата има тераса обложена со зеленило со поглед на Сена.