Загадувањето на воздухот го зголемува ризикот од автоимуни болести

Истражувачите од Универзитетот во Верона, откриле дека долготрајната изложеност на загадувачи од сообраќајот и индустријата, поврзана е со приближно 40% поголем ризик од ревматски артристис, 20% поголем ризик од инфламаторни болести на дигестивниот тракт, како Кроновата болест и улцерозниот колитис и 15% поголем ризик од болести на врзивното ткиво како лупус. Аерозагадувањето е предизвикано од емисиите од термоцентралите, индустријата и сообраќајот,  при што може да се покрене адаптивниот имунитет кај човекот. Понекогаш тој адаптивен одговор е погрешен, па предизвикува појава на автоимуни болести.

Студијата ја анализирала просечната долготрајна изложеност на честички од типот PM10 и PM2.5. Податоците за квалитетот на воздухот се добиени од  617 мерни станици во 110 италијански региони. Пронајдена е поврзаност на долготрајната изложеност на PM10 во концентрации над 30 микрограми по кубен метар и PM2.5 над 20 микрограма по метар кубен, со порастот на дијагнозите на автоимуни болести за 12, односно 13 проценти.  Студијата е објавена во часописот PMD Open, и ги земала во предвид сеопфатните медицински информации за 81,363 мажи и жени од италијанските бази на податоци, за периодот од јуни 2016 до ноември 2020 година, Кај 12% од испитаниците, токму во тој период била дијагностицирана некоја автоимуна болест.

Сепак, авторите ги толкуваат резултатите со резерва. Тие истакнуваат дека ова е опсервациона студија и како таква не може прецизно да ги утврди причините, бидејќи постоеле и одредени ограничувања кои влијаеле на резултатите. Помеѓу нов е недостатокот на информации за датумите за почетокот на симптомите на автоимуните болести, потребата од поголем и посеопфатен примерок и сл.

Досега се објавени над 70.000 научни трудови кои покажуваат дека загадувањето на воздухот влијае врз нашето здравје. Со сеопфатни научни анализи докажано е дека аерозагадувањето влијае на деменцијата, болестите на срцето и белите дробови, предизвикува проблеми со плодноста, дијабетес, функционирањето на црниот дроб, негативно влијае на менталните процеси и ја намалува интелигенцијата. Според податоците на Светската здравствена организација, над 90% од глобалната популација е изложена на токсичен воздух, а тој е одговорен за над 8 милиони предвремени смртни случаи годишно.