Порта3 – градежништво, архитектура и екологија Порта3 – градежништво, архитектура и екологија
Непосредно пред протестот што го најави НВО „Еко Герила“ против загадувањето на воздухот, општина Тетово ги претстави мерките за заштита што ќе се преземат, а ги соопшти градоначалничката Теута Арифи.
„На двете клучни точки за влез и излез од градот, односно кружниот тек кај Веро и оној на булевар Илинден, локалниот општински инспекторат и полициската единица од Тетово вршат чести контроли за обезбедување специјален режим на сообраќај, особено за тешки товарни возила на кои не им се дозволува влез во градот. Исто така, се ограничува и движењето на возилата што вршат достава на стоки во време на најголемата фреквенција на возила во градот.
Општинскиот инспекторат спроведе инспекции на индустриските капацитети кои оперираат со дозвола Б или еколошки елаборати“, рече Теута Арифи, градоначалничка на општина Тетово. Од локалната власт сериозно размислуваат и за воведување јавен градски превоз и зонско паркирање.
Меѓутоа, од граѓанското движење за заштита од загадувањето на воздухот, бараат од општината овие мерки да не останат само на хартија, туку да се спроведуваат во континуитет.
Тетовци во цела 2014 година дишеа 310 дена загаден воздух. Поради ваквата алармантна состојба граѓанското здружение „Еко Герила“ во петок најавува нов протест против аерозагадувањето.
