Тапети што комбинираат архитектура и соништа

LATOxLATO дебитира во дизајнот на тапети соработувајќи за прв пат со Inkiostro Bianco, италијански бренд специјализиран за украсни облоги кои комбинираат уметност, архитектура и дизајн.

Резултатот е серија на евокативни метафизички тапети кои на просторите им даваат етерична, но сепак динамична димензија. Станува збор за оригиналната интерпретација и придонес на Inkiostro Bianco кон линијата Flow, која се карактеризира со флуидност, ритам на форми и бои, кои ги разбиваат границите и ригидноста.

„Воодушевени сме поради оваа соработка со компанија како Inkiostro Bianco, автентична лабораторија на идеи која ни даде целосна доверба и голема креативна слобода. Како да успеавме да ја насликаме нашата визија на празно платно. Во секој обем што го работиме, од зграда до дополнување на мебелот, а сега и тапети, сакаме да го комбинираме архитектонскиот знак со метафизичката атмосфера“, велат Вирџинија Валентини и Франческо Брегансе, основачи на брендот LATOxLATO.

Заедничката нишка што се провлекува низ четирите дизајни што студиото ги создаде за линијата Flow е одраз на односот помеѓу ентериерот и екстериерот во архитектурата. Графиките „Archscape“ и „Metropolis“ го евоцираат градот од перспектива на оние кои претпочитаат да му се восхитуваат од далечина, во удобноста на нивниот дом. Волумените, скалите, прозорците, светлата и сенките проектирани на ѕидовите на зградите создаваат раздвижена, но речиси мистична и сонлива метропола.

Дополнително, „Bossage“ и „Coffer Mania“ покануваат поблиско истражување. Тоа е како да шетате низ урбаните улици и, привлечени од светлината што избива од соба, фантазирате за околината и луѓето што ја настануваат, дозволувајќи ѝ на имагинацијата да талка во нематеријална и лебдечка димензија.

Како и кај секој LATOxLATO проект, истражувањето на боите е од суштинско значење при дизајнирање на тапетите, без разлика дали се работи за приватни имоти или за јавни простори. Секој дизајн е достапен во различни варијанти на бои, што го олеснува вклопувањето во секаков тип на опкружување и усогласувањето со различни стилови на ентериери.