Shanfeng Academy во Кина – училиште и културен центар за локалната заедница

Тимот на бирото OPEN Architecture го слави завршувањето на зградата Shanfeng Academy, културен и спортски центар сместен во Suzhou, Кина. Објектот е проектиран да ги задоволи потребите на речиси 2.000 ученици на билингвалното училиште Mountain Kingston, додека истовремено служи како културен центар за локалната заедница.

Архитектите истакнуваат дека за време на развојот на проектот, биле под влијание на сложените кинески пејзажни цртежи и традиционалните Suzhou Gardens, кои настојувале да ги почитуваат додека се справувале со современите урбани и образовни предизвици.

За да се зголеми просторот и да се прилагоди на големиот број корисници, тимот на OPEN Architecture ја поделил зградата на академијата во група од пет поединечни структури, сите поврзани со патеки на кровот. Помеѓу градините и волумените има полуотворени патеки каде колонадите и нивните сенки создаваат празнини.

На врвот на патеките се наоѓа петтата градина, место за повлекување и собирање кое ги поврзува сите главни функционални простори горе и долу. Овие празнини делуваат како необоени делови во традиционалните кинески пејзажни цртежи, обезбедувајќи простори за дишење, каде што луѓето можат да се релаксираат и забавуваат, додека светлината и сенките, менувањето на небото и облаците, капките дожд и лисјата што паѓаат ги анимираат.

Иако е поделена меѓу повеќе волумени, зградата претставува единствена целина свртена навнатре, која е заштитена од околниот град. Како интеракција помеѓу училиштето и градот, објектот споделува многу простори со заедницата надвор од кампусот. За време на училишниот распуст, театарот, спортскиот центар и базенот можат да бидат отворени за јавноста.

Комплекс овозможува проникнување на воздухот и светлината, при што природното осветлување и вентилацијата играат значајна улога во намалувањето на потрошувачката на енергија. Петте волумена на објектот содржат простори за читање, спорт и уметност, секој со своите особености, но заедно формираат синергетска целина.

Објектот е обвиткана во бел бетон формиран од оплата за да и оддаде почит на традиционалната архитектура на „бели ѕидови – сив кров“ на областа Suzhou. Оваа стратегија служи за надминување на потребата од постојаното одржување на традиционалниот бел малтер.

Shanfeng Academy е модерен академски кампус и културен центар кој ги комбинира традиционалните и современите елементи за да обезбеди жив, енергичен простор како за студентите, така и за заедницата да се поврзат и да напредуваат.