Романија планира пет мерки за намалување на цената на струјата и стабилизирање на пазарот

Романија претстави пакет од пет мерки со кои се планира намалување на цената на електричната енергија и генерален развој на енергетскиот пазар. Министерот за енергетика ги презентирал овие мерки на прес конференција во Букурешт, нагласувајќи дека само 51% од сметките за струја се однесува на реалниот трошок за потрошена енергија, додека остатокот оди на мрежни тарифи, данок и акцизи.

Првата мерка се однесува на воспоставување на механизмот Market Maker, односно избор на оператор кој ќе обезбеди поголема ликвидност на пазарот, ќе ги поттикне долгорочните договори и ќе придонесе за стабилно намалување на цените. Втората мерка подразбира задолжителни гаранции за сите учесници на пазарот со цел зголемување на транспарентноста и намалување на ризиците. Како трето решение се предвидува воведување на динамички и диференцијални тарифи кои ќе ги наградат потрошувачите кои користат енергија во периодите кога таа е најефтина. Четвртата мерка се однесува на трошоците на дистрибутерите, каде се воспоставува единствен механизам на набавка на струја за нивните потреби, што би резултирало во пониски дистрибутивни тарифи за сите потрошувачи. И на крајот, петтата мерка се однесува на обединувањето на сите програми за енергетска ефикасност, кои ќе бидат координирани од страна на Минситерството за енергетика, со цел остварување на воедначени ефекти.