Реконструкција од бајките: стакло, тула и сламен кров во куќа стара 120 години

Бајковита и модерна колиба, куќа за одмор со кров од слама и стаклена доградба, создадена е со реконструкција на стара, трошна куќа на земјоделци од крајот на 19 век. Оригиналната форма на колибата е зачувана, а внатрешниот простор е променет во модерен, удобен и енергетски ефикасен ентериер.

На северот на Германија, на брегот на Балтичкото море и во резерват на природа, каде што може да се видат диви коњи и елени, брачен пар од Хамбург купил куќа за реновирање, каде ќе го поминуваат слободното време, со намера целосно да се преселат таму кога ќе се пензионираат.

Оригиналната куќа, напуштена долго време, била во многу лоша состојба. Некогаш изградена од локални земјоделци, се состоела од многу мали простории за луѓе и животни, под карактеристичен сламен кров.

Архитектите од Копенхаген, Јан Хенрик Јансен и Маршал Блечер, биле ангажирани да ја реновираат колибата и да ја трансформираат во модерна селска куќа за одмор. По проценката на постојната состојба, изготвен е проект за реконструкција, кој подразбирал повторна изградба на голем дел од објектот, реставрација на фасадата, како и целосно нова основа на внатрешните простории. Приоритет било да се зачува првобитниот изглед на куќата, додека во околината има бројни примери на стари куќи реновирани до непрепознатливост.

Најголемата промена во изгледот на куќата е стаклената доградба, дискретно поставена на дворниот агол на куќата, поврзана со надворешната тераса.

Ова проширување овозможило да се создаде пространа дневна соба со единствен поглед на природата.

Фасадата од тули е внимателно реконструирана. За да се извршат потребните работи на конструкцијата, прво била демонтирана, а потоа повторно составена на ист начин. Поставени се нови прозорци, но само на места каде веќе постоеле отвори.

Традиционалниот сламен кров, кој одамна го надминал својот животен век од 50 години, е целосно заменет, следејќи ја формата на оригиналот, но и новиот распоред во внатрешноста, со додавање на нов челичен дел за проширување.

Внатре, таваните беа толку ниски што во некои делови од куќата било невозможно да се стои исправено. Лавиринт од дури четиринаесет мали простории е поврзан и отворен во пространа дневна зона, а таванот е делумно отстранет, што резултира со двојна висина и пријатен амбиент под стрмните коси кровови со видливи дрвени греди.

Удобен, модерен и енергетски ефикасен ентериер

Масивен бетонски блок долг шест метри на централна положба служи како кујнски остров и трпезариска маса, а поставен е со помош на кран при реконструкција на кровот.

Доградбата на куќата е направена со челична конструкција со стакло, а овој простор, малку спуштен под нивото на терен, е вистинска оаза за одмор и уживање со поглед на зеленилото. Мебелот е удобен и едноставен, оставајќи доволно слободен простор во овој транспарентен амбиент.

Куќата има две спални соби, една главна на приземје и другата гостинска на катот. Дрвениот мебел е изработен по мерка, а придружен е со дрвени подови.

Целиот ентериер е уреден со топли, неутрални тонови и природни материјали, создавајќи чувство на топлина и удобност во оваа модерна колиба.

Квалитетната изолација, подното греење и дрвените прозорци со тројно застаклување ги исполнуваат германските критериуми за енергетска ефикасност.

Модерни и топли, со силно влијание на традиционалното, архитектите Јансен и Блечер мајсторски го оживеале амбиентот на колиба во природа, опремена за тивки викенди, како и за секојдневно функционирање со високи барања за функционалност, естетика и одржливост.