Прекрасна вила на Миконос со дневна соба на отворено (ВИДЕО)

Заснована на кикладската традиција и направена од локални материјали, оваа камена вила е добитник на бројни награди. Главниот простор за престој е голема тераса покриена со пергола, додека парчиња камен ископани на локацијата добиле свое специјално место.

Скриена од погледите на минувачите во ридовите на Миконос, а отворена кон морето и зајдисонцето над кикладските острови, сместена е Вила Мандра, исклучителен проект на грчки архитекти од бирото K-Studio.

Инспирирана од традицијата, камената вила се состои од три помали волумени кои опкружуваат голема тераса покриена со пергола, со отворен поглед на морето.

Исто така инспирирани и од скромноста и комплексноста на локалното наследство, проектантите својот архитектонски израз го свеле на два помали, традиционално бели волумени и трет од камен ископан на самата локација, позиционирани околу голем отворен простор покриен со дрвена пергола.

Природно интегриран во островскиот амбиент, камениот ѕид е изѕидан и околу уредената градина, чувувајќи ја приватноста на локацијата. Некои од камените ѕидови се оставени груби и необработени, додека некои традиционално се обоени со бела вар.

Куќата е градена за млад пар, како вила за одмор со шест соби во која би уживале со семејството и пријателите. Идејата за опуштен летен живот, поврзување со драги луѓе и природата, имала најголемо влијание врз развојот на концептот, па архитектите наведуваат дека овде формата, наместо да ја следи функцијата, ги следи емоциите и секој дел од просторот станува нова можност за одмор, размислување и истражување.

Централната точка на концептот е голема покриена тераса опкружена со поврзаните волумени на куќата, замислена како заеднички простор за дружење и одмор, сличен на голема дневна соба на отворено. За да може оваа идеја да функционира во сончеви и топли климатски услови, терасата е покриена со лесна дрвена пергола, која дава сенка и заштита.

Директно поврзана со внатрешната дневна соба и кујната, а со величенствен поглед преку базенот кон Егејското море, терасата е опремена со голема дрвена трпезариска маса и удобен надворешен мебел, заедно со шармантни декоративни детали.

Клучна за карактерот на куќата е палетата на традиционални материјали како вар, камен и дрво, применети и прилагодени на современите техники, создавајќи инспиративна архитектура која го спојува локалното наследство со современиот начин на живот.

Свртени кон базенот, кујната и дневните простории се отвораат кон дворот, додека спалните соби се сместени во посебни згради од секоја страна заради поголема приватност.

Природниот камен и дрвото ги поврзуваат ентериерот и екстериерот, со светли песочни тонови и многу зеленило. Изборот на декоративните детали се надоврзува на идејата за поврзување на традиционалното и модерното, така што делата на модерната уметност се застапени истовремено со предметите и мотивите на историска Грција.

Под градината со базен се наоѓаат спалните соби, каде што непречено се ужива во директен поглед на морето. Со одвојување на спалните соби направена е јасна граница помеѓу заедничкиот и приватниот простор.

Деталите како што се заглавието на креветот изработено од ленено платно, затегнато меѓу метални шипки, ноќните орманчиња направени од дрвени кутии во камените ниши, како и мермерните пултови со бели мијалници во бањата, зборуваат за целосна посветеност на дизајнот и обмислено следење на концептот.

Камен ископан на самата локација и рачно обработен, е симбол присутен низ целиот комплекс. Кај предниот влез, означен со размак во камениот ѕид, дрвен кровен носач се протега низ терасата и се потпира на надворешниот агол на големо парче груб камен наместо столб. Исто така, повеќе груби камени блокови се расфрлани по ходниците и околу базенот, формирајќи камени патеки од спалните соби до главниот простор за живот на отворено.

Во контраст со овие груби детали, стои едно дрво маслинка кое го задржало својот простор и добило парче небо со сечење на отвор во перголата, за да може непречено да расте.

Вила Мандра е повеќекратно наградуван проект на едноставна, но луксузна медитеранска куќа, базирана на кикладската традиција, збогатена со природни материјали и инспирирана од современ летен начин на живот.