По 26 години, резиденцијата на Чаушеску отворена за јавноста

Пале Примавери (Пролетниот дворец) минатата недела беше за првпат отворен за јавноста, цели 26 години по падот на режимот на Чаушеску. Се работи за резиденцијата на Чаушеску и неговото семејство, изградена во поранешната елитна населба на комунистичката номенклатура во периодот 1964 – 1965 година.

Според соопштението на властите, брачната двојка Николае и Елена Чаушеску и нивните деца Зое, Валентин и Нику, во неа престојувале од 1965 до декември 1989 година, кога по протестите во центарот на Букурешт, го напуштија градот, а набрзо потоа беа уапсени и осудени на смрт.

Резиденцијата, која во првиот ден од отворањето бесплатно ја посетиле повеќе од 300 лица, долго била користена за сместување на странските официјални гости. На продажба била понудена во 2014 година, но без големо внимание од потенцијалните купувачи.

Луксузната вила има 80 соби украсени со огледала од мурано стакло и разни луксузни украси, како лустери и мозаици кои лично ги избирала Елена Чаушеску, а во неа е уреден и внатрешен базен, киносала, импресивна гардероба, подземен бункер и градина по која се шетаат пауни, а се простира на вкупно 14.000 квадратни метри.