Новите тапети на Карим Рашид ја бришат границата помеѓу ѕидот и уметноста

Познатиот дизајнер, претстави колекција тапети кои не само што пленат со својот изглед, туку ги исполнуваат и барањата за акустика, хигиена и издржливост.

Ако некој знае како да го направи дизајнот незаборавен, тоа е Карим Рашид. Неговите нови тапети за брендот WallPepper® се создадени за оние кои сакаат повеќе од само декорација.

Колекцијата Immersive Surfaces го носи токму тоа – ѕидни површини кои зборуваат, дишат и одѕвонуваат во ритамот на современите ентериери.

Живи форми што ги будат сетилата

Новата колекција се состои од десет ексклузивни графики потпишани од Карим Рашид. Во фокусот се светли бои, непредвидливи форми и текстури што изгледаат речиси опипливи.

Наместо тапетите да бидат позадина, тука тие стануваат протагонисти на просторот – без разлика дали станува збор за хотелско лоби, бар, канцеларија или приватен ентериер.

Секоја тапета се печати по мерка, според димензиите на ѕидот, и може дополнително да се персонализира со боја или дури да се креира сосема нов мотив.

Ова ниво на флексибилност е идеално за архитекти и дизајнери кои сакаат да остават автентичен белег во своите проекти.

Технологија во служба на дизајнот

Зад атрактивниот изглед се крие внимателно дизајнирана технолошка позадина. Тапетите WallPepper® се достапни во различни видови материјали – од оние отпорни на влага, до антибактериски и звучно апсорбирачки подлоги.

Особено се издвојува WP/Acoustic слојот, кој, благодарение на комбинацијата од стаклени влакна и заштитен слој, обезбедува висока акустична апсорпција и долгорочна отпорност.

Поставувањето е прецизно и едноставоа: панели со ширина од 94 центиметри се лепат директно на ѕидот, без преклопување, што резултира со беспрекорно рамни површини и совршен графички континуитет.

Ѕидот како простор на доживување

Колекцијата Immersive Surfaces на Карим Рашид ги спојува уметноста, дизајнот и инженерството во тапети што го трансформираат просторот.

Наместо да се претопуваат со ѕидот, тие го претвораат во фокусна точка и незаборавно искуство.