Летна Сцена – Лепеза: Хармоничен танц на архитектурата и природата

Доколку се прошетаме во оној маргинален дел на скопскиот Градски парк, кон крајот на „новиот дел“, ќе наидеме на нов урбан атрактор во служба на посетителите на паркот, наречен „Летна сцена – Лепеза“. Реализирана како резултат на архитектонски конкурс организиран од Град Скопје, Сцената ја отелотворува синтезата на архитектурата и природата, нудејќи им на граѓаните едно ново прибежиште, како дополнителна причина за посета на овој помалку запуштен дел на Градскиот парк во Скопје.

Покрај неговата основна функција како Летна сцена, овој архитектонски објект преку неговата физичка појавност претставува тестамент за умешна интеграција на изградена структура во природен контекст. Објектот го сочинуваат армиранобетонски темели, под од камени коцки, челична носечка конструкција и дрвена облога склопени во една уникатна скулптурална коноидна форма на отворена летна сцена.

Сепак, изборот на материјали е тој што навистина ја акцентира авторската идеја за т.н. „архитектонска мимикрија“ – претопување на изградениот објект во природниот контекст кој го опкружува. Дискретната челична конструкција е обложена со дрвени талпи, внимателно одбрани не само поради нивната естетска привлечност, туку и поради нивната улога во интеграција на објектот со природната околина на паркот. Летната сцена на тој начин станува составен дел на Градскиот парк, хармоничен танц на архитектурата и природата.

Она што го прави овој архитектонски објект посебен е неговата приспособливост и мултифункционалност. Освен неговата примарна функција – Летна сцена за музички настани, објектот има можност за ротација околу сопствената хоризонтална оска, трансформирајќи се во Летна сцена за филмски проекции. Во сите нејзини, четири можни позиции, сцената претставува фокална точка во Градскиот парк за одржување на најразличен тип на настани – музички концерти, кинопроекции, јавни предавања итн.

Како една од главните цели при проектирањето на летната сцена се препознава тенденција кон одржливост. Преку соодветниот избор на локацијата за реализација на проектот, авторите успеваат да ја вметнат сцената во природната околина без притоа да се исече ниту едно дрво, што е израз на еколошката посветеност на тимот. Употребените материјали дополнително ја нагласуваат посветеноста кон минимален еколошки отпечаток.

Во текот на изминатите три години, Летната сцена се воспостави себеси како популарно место на посетителите за најразлични настани на отворено, од музички концерти под отворено небо, до роденденски прослави, свадбени фотосесии, друштвени собири, хуманитарни настани итн. Соживувајќи се постепено со својата улога, Летната сцена како урбан атрактор ја отелотворува културната визија за Скопје, и се манифестира себеси како нераздвоен чинител во тенденцијата на градот да стане регионална престолнина на културата.

На овогодинешниов настан на Big See, одржан во Љубљана, „Летна Сцена – Лепеза” во категоријата City and Community, беше наградена.

Автори: проф. д-р Александар РАДЕВСКИ, проф. д-р Бојан КАРАНАКОВ