И ова некогаш беше Скопје…„Загрозени видови“

На 30 ноември во Природнонаучниот музеј во Скопје се отвори архитектонската изложба „Загрозени видови“ како резултат на истоимениот истражувачки проект на авторите Јован Ивановски, Ана Ивановска-Дескова и Владимир Десков.

Изложбата преку макети, цртежи, фотографии и текстови претставува значајни градби од поновата архитектонска историја на Скопје, кои претставуваат архитектонско наследство и на различен начин и во различен обем соучествуваат (а дел од нив се и клучни) во обликувањето на современиот архитектонски идентитет на градот.

Изложбата не случајно е поставена токму во Природнонаучниот музеј каде се претставени загрозените биолошки видови чив опстанок зависи од нас. Симболиката е повеќе од јасна и опстанокот на градот, кој е еден жив организам исто така зависи од нас.

Преку изборот на карактеристични архитектонски „примероци“, истражувањето има за цел да укаже на вредностите на овие градби и на нивната состојба, на степенот на загрозеност и главните причини кои водат до него.

Со изложбата „Загрозени видови“ авторите се обраќаат подеднакво кон стручната, но и кон пошироката јавност, со цел да ја нагласат потребата од отварање на прашањето за опстанокот на вредните градби од периодот на Модерната, како и прашањето за нивниот натамошен третман.