Групирани станбени единици со поглед на пејзажот на Кенго Кума

Единиците се распоредени на начин што овозможува широк поглед на пејзажот, природна светлина и отворени простори.

Kengo Kuma and Associates (KKAA) се проектанти на резиденција со повеќе единици на планина со поглед на градот Сапоро, во Хокаидо, Јапонија.

Комплексот се развива во хоризонтален распоред, а поединечните станбени единици се вгнездени во падината на ридот и поставени се во скалеста форма, спојувајќи се со пејзажот и топографијата. Секоја мала куќа е поставена за да создаде отворен простор и поглед на панорамата. Ова исто така овозможува и изобилство природна светлина да влезе во сите резиденции.

Надворешните и потпорните ѕидови се обложени со трупци од локално потекло. Во обид да се комбинираат дрвото и бетонот, архитектите всушност користеле дрвени панели со груба кора како оплата за бетон.

Комплексот се состои од повеќе од 15 единици и во секоја од нив има голем простор за спиење, сопствена бања со сауна и кујна. Пристапот до секоја единица е возможен преку централни отворени скали.