Градежен факултет и АДИНГ го организираат БЕТОН.Ск

Во рамки на серијата настани насловена како „Скопско асеизмичко лето“ кои се посветени на одбележување на 60. годишнината од скопскиот земјотрес, Градежниот факултет УКИМ во Скопје, АДИНГ АД Скопје и СГГУГС „Здравко Цветковски“ го организираат БЕТОН.Ск.

Настанот е закажан за 10.07.понеделеник, во 11.30 часот во дворот на АДИНГ. 

Главна цел на овој, пред сè, едукативно – стручен настан посветен на производството на бетон како најмногу употребуван и истовремено најчуствителен на импровизации конструктивен материјал, е подигнувањето на јавната свест за потребата, значењето и улогата на квалитетно домашно градежништво, а со тоа и на отпорните градби кои се единствен одбранбен механизам од дејството на земјотресите и другите природни хазарди.

Истовремено, со него сакаме да ја потенцираме важноста од доследно почитување на стандардите и пропишаните за изработка на квалитетни градежни материјали, без што се навлегува во зона на ризични авантури со несогледиви последици.

Пет групи составени од по два студенти од Градежниот факултет и еден ученик од средното училиште „Здравко Цветковски“ ќе треба да приготват бетон со одреден квалитет и да го вградат во контролни пробни тела. Јакоста на притисок на изработениот бетон ќе се испита на 26. јули во 5:17 часот. Со ова симболично сакаме да ја одбележиме 60. годишнината од земјотресот чии катастрофални последици најмогу се должат на лошиот квалитет на тогашните градби. Истовремено настанот треба да послужи и за зголемување на видливоста на градежништвото како дејност од суштествено значење за нормално функционирање и развој на државата.

Декан на Градежен факултет, УКИМ, Скопје

Проф. д-р Горан Марковски