Гимназијата Кагава на Кензо Танге ќе се урива

На иконичната зграда очигледно и треба скапа реставрација, а локалните власти сметаат дека е поповолно да се урне.

Гимназијата на профектурата Кагава во Такаматсу од 1964 година, дело на јапонскиот архитект Кензо Танге, добитник на наградата Прицкер, од 2014 година е под закана од уривање, по затворањето поради прокиснување на кровот.

Локалниот гувернер, Тојохито Икеда, неодамна потврди дека објектот ќе биде урнат, што предизвика гнев и тага кај локалното население, кое е многу приврзано со култната зграда и кое започна петиција за нејзино спасување, предводена меѓу другите и од архитектот Норијуки Каваниши.

Бетонската гимназија Кагава има карактеристична овална структура – со намера да потсетува на традиционалниот јапонски дрвен чамец – што се издигнува од двете страни и е носена од четири огромни столбови. Овој посебен облик го отежнувал поправањето на неговиот бетонски кров. Зачувувањето на зградата, всушност, би чинело две милијарди јапонски јени – приближно 14 милиони евра.

Во моментов, во близина, во изградба е нов спортски објект проектиран од SANAA. Светскиот фонд за споменици веќе предупреди дека овој нов проект може да претставува закана за иднината на салата и поради ова во 2018 година ја вклучи на својата листа „World Monuments Watch 2018“.

Иако времето на уривање на објектот допрва треба да се објави, Каваниши верува дека работите би можеле да започнат за неколку години и повикува на поголема свест за важноста на архитектонската конзервација во Јапонија.