ЕУ треба да го оптимира вложувањето во обновливи извори

Европа може да заштеди 86 милијарди евра доколку оптимално ги развива капацитетите за производство на електрична енергија од обновливи извори, односно кога фотоволтаиците би се поставувале во подрачја со најголем број сончеви денови, а ветерните турбини во најветровитите подрачја. Ова е еден од заклучоците од последниот Eкономски форум во Давос одржан во периодот 21-24 јануари.

Истовремено се предупредува на преголемите пазарни капацитети за производство нa електрична енергија од обновливи извори. Исто така се поттикнува создавање на механизам со помош на кој би се помогнало на компаниите да ги покријат трошоците во централите на гас и јаглен во деновите кога понудата од обновливите извори не може да ја покрие побарувачката.

Дополнителни 34,5 милијарди евра ЕУ може да заштеди со подобра прекугранична координација и поврзување, се наведува во извештајот подготвен од американската консултантска куќа Бејн (Bain) за потребите на Светскиот економски форум, поточно за платформата „Иднината на електричната енергија“.