Црквата „Св. Рамноапостоли цар Константин и царица Елена“ добитник на Големата годишна награда 2025 на AAM

Во амфитеатарот на Архитектонскиот факултет при УКИМ во Скопје, свечено се додели Големата годишна награда за најуспешно реализирано архитектонско дело за 2025 година (ГГН) – манифестација која е под покровителство на Претседателот на Република Македонија, а традиционално секоја година на крајот на декември ја организира Асоцијацијата на архитекти на Македонија – ААМ.

ОВАА ГОДИНА ВО КОНКУРЕНЦИЈА БЕА ЧЕТИРИ ОБЈЕКТИ:

• Индивидуална станбена куќа во Бардовци –студио „Инженеринг Инпекс С.А.“, Скопје; автори: Искра Арсова и Мишо Арсов
• Детска градинка во Делчево – студио „Квадар“ Скопје; автори: Билјана Петрова, Марија Костовска и Милица Касапинова
• Детска градинка во населба Пролет Скопје – студио „ИНКОМ Инженеринг“, Скопје; автори: Снежана Костовска и Билјана Кубуровска, консултант Игор Котларовски
• Православен храм – црква „Св. Рамноапостоли Цар Константин и Царица Елена“, Скопје – студио „Лелелеле“; автори: Искра Лековска и Владимир Лековски

Добитник на ГГН на ААМ за најуспешно реализирано архитектонско дело во 2025 е Православен храм – црква „Св. Рамноапостоли цар Константин и царица Елена“ во Скопје на авторите Искра Лековска и Владимир Лековски од архитектонското студио „Лелелеле“.

Наградата на добитниците им ја врачи претседателката Гордана Сиљановска-Давкова.

На свеченоста таа порача: „Архитектурата, како триаголник на наука, уметност и општествен ангажман, има суштинско влијание на убавината и функционалноста на јавниот простор, односно врз квалитетот на урбаното живеење.

За авторите на награденото архитектонско дело, црквата ‘Св. Константин и Св. Елена’ е метафора за македонската колективна меморија и идентитет и ја персонифицира хармонијата меѓу небото и земјата, духовното и световното, традицијата и современоста.

Честитки до добитниците! Наградата има силна, едукативна и инспиративна вредност за архитектонската фела и за младите архитекти! “.

фото: КИРО ПОПОВ