Порта3 – градежништво, архитектура и екологија Порта3 – градежништво, архитектура и екологија
Во рамките на 42-та меѓународна конференција „Пирански денови на архитектурата“, претпоследниот викенд од ноември во Аудиториумот во Порторож, доделени се наградите и признанијата Пиранеси. Жирито ја додели главната награда на унгарското биро OKKA architects за проектот „Куќа и кошница“ во близина на езерото Балатон, препознаен како истражување на односот помеѓу традиционалните и модерните методи на градење.
„Куќа и кошница“
Меѓу 50 архитектонски проекти номинирани од национални селектори од 11 европски земји, меѓународната почесна награда „Пиранеси 2025“ им припадна на авторите на проектот на Центарот за креативни индустрии и иновации „Ложионица“ и Куќата на е-Управа во Белград, од белградското биро AКВС aрхитектура.
„Ложионица“
Почесно признание доби проектот на Гробишта Анкаран, Словенија, заеднички потпишан од љубљанските канцеларии на VOID architecture (архитектура) и Studio AKKA (пејзажно уредување), додека признанието во студентската конкуренција ѝ припадна на студентката Ела Грасели (ментори проф. Маруша Зорец, доц. Урош Рустја) за проектот „Две долги куќи“ во Јесенице.
Гробишта Анкаран
„Две долги куќи“
Доживување на руралниот пејзаж внатре во куќата
Жирито го препозна проектот на архитектите Петер Сабо и Емеш Голомб од OKKA architects од Будимпешта како истражување на односот помеѓу традиционалните и модерните методи на градење; обложувањето на новите бетонски ѕидови потсетува на локалната техника на збиени ѕидови со видливи остатоци од постојните камени ѕидови.
„Во исто време, софистицираниот тектонски израз и создавањето уникатни просторни средини ја замаглуваат границата помеѓу ентериерот и екстериерот, овозможувајќи доживување на рурален пејзаж во куќата“ – се вели во објаснувањето на жирито со кое претседаваше архитектката од Шри Ланка, Палинда Канангара.
„Куќа и кошница“
Кога станува збор за „Ложионица“, жирито оцени дека проектот на АКВС архитектура ја трансформира историската железничка линија и инфраструктура на Белград преку адаптивна повторна употреба и нова структура, испреплетувајќи комплексна мешавина од канцеларии и јавни програми со поддршка на инвентивен, неконвенционален структурен систем.
„Неговиот современ архитектонски израз се справува со предизвикувачкиот урбан контекст на локацијата, создавајќи динамичен дијалог помеѓу наследството и проектот насочен кон иднината“, се вели во образложението на стручното жири за меѓународната почесна награда Пиранеси 2025.
„Ложионица“
Првиот добитник е Богдан Богдановиќ
За потсетување, наградите и признанијата „Пиранеси“ се доделуваат на најдобрите реализирани и студентски проекти од Австрија, Босна и Херцеговина, Хрватска, Чешка, Грција, Унгарија, Италија, Црна Гора, Србија, Словачка и Словенија, а оваа година доделувањето на наградата се одржа по 36-ти пат. Првиот добитник беше српскиот архитект Богдан Богдановиќ во 1989 година.
Повеќе за наградените проекти можете да дознаете на овој линк.
